Nýliðaferð í Staðará

Eins og fram hefur komið er nýliðaskrímsladeild Víðförla í miklu stuði þessa dagana og nú voru það Marteinn, Skafti og Jónas eldri sem fóru til veiða með upprennandi veiðimönnum (Jónas yngri/Haraldur/Ólíver) og væntanlegum Víðförlum um miðjan ágúst ....  með strákúst og varðhundurinn Erró var líka með í för.

Ferðinni var heitið í hina víðFÖRLAfrægu sjóbirtingsá Staðará á Snæfellsnesi. Það var mikill hugur í mönnum að vanda og Skafti gat ekki einu sinni komið sér í vöðlur fyrir æsingi og veiddi sinn fyrst fisk á inniskónum .... og lax var það heillin. Veiðin var þokkaleg og enduðum við með ca 20 sjóbirtinga þegar upp var staðið. Mikið var að fiski í sjónum en ekki vildi hann ganga inn í bunkum og mest var verið að reyta upp einn og einn.  

Ef það væri hinsvegar löglegt að veiða í sjónum hefðu Marteinn, Halli og Ólíver vaðið yfir ánna neðarlega og vaðið lengst út í sjó og grýtt spæni eins langt og druslan dregur.  Þá hefðu þeir sennilega veitt eina 7-8 birtinga og misst annað eins ... og sennilega hefði verið sett í einn rétt við stangarendann og sá hlunkur hefði svo tekið roku og síðan stokkið svo hátt að hann hefði hreinsaði sig gjörsamlega og síðan losað sig svo af önglinum ...  það veit sá sem þetta ritar að þessi fiskur hefði sennilega ekki verið undir 15 pundum.  En það má víst bara alls ekki veiða í stöng á sjó þannig að þetta hefði aldrei getað gerst.  

Þetta var hin besta ferð í alla staði og menn og varðhundur skemmtu sér konunglega ... nenni ekki að segja söguna af veiðiþjófunum :-)   Myndir á myndasíðu

Marteinn