Veiðitímabilið 2009 hafið.

Sælir Viðförlafélagar og aðrir veiðimenn.

Þá er veiðitímabilið 2009 hafið og má segja að það hafi hafist með stæl. Tveir af okkar félögum fóru þann 4 apríl í Varmána og má segja að bæjarlækur annars þeirra hafi tekið honum opnum örmum. Alls landaði hollið (4 stangir) 3 fiskum og að sjálfsögðu tóku þeir Víðförla kumpánar þá alla. Það sem var merkilegast við þennan afla var stærðin á fiskunum en þeir voru 3kg. 5kg. og 7kg. og er það aldeilis frábær veiði svona í upphafi veiðitímans. Að sjálfsögðu var þeim öllum sleppt eftir rækilega mælingu samkvæmt reglum um veiðar í Varmánni.

Miklar umræður hafa farið fram á síðum veiðimanna um þessa fiska og þá sérstaklega þann stærsta og virkilega gaman að skoða og lesa þessar pælingar. Vil ég hvetja veiðimenn til þess að fara t.d. inná votnogveidi.is en þar getið þið séð myndir af mönnum og dýrum og lesið hugleiðingarnar um fiskana.

Næsta ferð okkar Víðförlafélaga er 17-19 apríl í Steinsmýrarvötnin. Í þá veiðiferð eru skráðir eftirtaldir Víðförlafélagar, 10pundarinn, Laxafangarinn, Urriðabaninn, Laxarinn, Sporðurinn, Birtingurinn, Hængurinn og Ormurinn. Þá hefur ykkar ástkæri boðað komu sína svona til þess að halda utanum aflabrögð og almennar stærðarmælingar og talningar á fiski. Þá mun hann einnig sjá til þess að bera næringu að hinum Víðförlafélögum svo þeir svelti sig ekki í af æsingi. Af aflabrögðum í Steinsmýravötnum er það að frétta að mjög vel hefur aflast þá daga sem hægt hefur verið að standa við veiðir. Því miður hefur veður hamlað mjög veiðum á svæðinu til þessa en vonandi lagast það með hækkandi sól.

Eins fram kom fyrr í vetur þá vorum við búnir að bóka allnokkra veiðtúra en nú er frágengið að við förum fyrir utan Steinsmýrarvötnin í eftirtaldar ár.  Fáskrúð, Staðará (2), Iðu, Laxá í Þing, Laxá í Leir og Langá. Þetta verða örugglega Víðförlatúrar og væntanlega verða þeir fleirri þegar líður á og vonandi verða þá veiðileyfin á skaplegra verði.

Það er von mín að sumarið verði ykkur gjöfult og skemmtilegt og gleðilega páska.

Kveðja Hattarinn.