Veiðisumarið 2010.

Sælir félagar. Það styttist heldur betur í að laxveiðin hefjist sumarið 2010. Fyrstu árnar opna 5 júní og ríða Norðurá, Blanda og Laxá á Ásum á vaðið. Aðrar ár fylgja svo í kjölfarið hver af annarri. Nú þegar hefur lax sést í allmörgum ám og líta menn björtum augum til sumarsins hvað varðar fiskigengd. Það er þó eitt sem menn óttast og þá sérstaklega vestan og sunnanlands en það er vatnsmagnið í ánum. Síðasti vetur var mjög snjóléttur á þessu svæði og þar af leiðandi frekar lítill snjór í fjöllum til að viðhalda rennsli vegna snjóbráðar. Laxveiðimenn eru upp til hópa all svakalegir bjartsýnismenn og láta ekkert svona hjal setja sig út af laginu. Þeir láta sig hlakka til. Mér sýnist eftir að hafa skoðað laus veiðileyfi hjá Svfr.is og Agn.is að veiðileyfasalan sé svipuð og í fyrra. Bestu tímarnir eru seldir og flest öll leyfi í litlum ám án fæðis og húsgjalda eru uppseldar. Eftir standa dýrari árnar með fæði og húsnæði á jaðartíma óseldar en það sama gerðist í fyrra. Þegar tímabilið hófst og vatnsleysið fór að herja á seldust haustleyfin eins og heitar lummur. Ég hugsa að það sama gerist núna.                                                                                                       Ég finn það núna hvað það var svakalega gott að komast í Vatnamótin í apríl svona til þess að ná úr sér mesta veiðihrollinum. Ef sú ferð hefði ekki verið farin væri maður orðinn alveg viðþolslaus í línuputtanum sem er alltaf að krjækj í línuna þegar maður dregur inn. Það halda sumir að þetta sé einhver kækur hjá manni en skilja þetta alveg þegar maður segir þeim hvað maður er að gera. Auðvitað sigraði okkar maður í keppni þeirra tvíbura eins og við náttúrulega vissum. Það olli mér hinsvegar talsverðum vonbrigðum að hann skyldi ekki rúlla yfir bróðir sinn þegar þeir veiddu Langána. Því þar er Ási á algjörum heimavelli. Hefur veitt í þessari á til margra ára. Honum er þó vorkunn því nú voru þeir við veiðar í júlí en Ási veiðir hana alltaf í september. Þar gæti munurinn legið. Allar veiðiferðir Víðförla eru nú uppseldar og verður að óbreyttu fyrsti túrinn farinn í Staðarána 21 júlí og veitt 22 og 23 júlí. Síðan koma túrarnir hver á eftir öðrum. Að öllu óbreyttu verður sennilega síðasti túrinn í Vatnamótin fyrstu helgina í Október. Þá verðum við að eltast við golla, reyndar þessa stóru sem við slepptum í vor!!!!!

Kv. JM.